غزہ میں شدید غذائی قلت سے بچوں کو موت کا خطرہ لاحق ہے، ڈبلیو ایچ او

جنیوا : ورلڈ ہیلتھ آرگنائزیشن کے سربراہ نے خبردار کیا ہے کہ غزہ میں بچوں کو شدید غذائی قلت کا سامنا ہے جس کے سبب وہ موت کے خطرے سے دوچار ہیں۔ ٹیڈروس ادھانوم نے سوشل نیٹ ورک ایکس پر لکھاہےکہ شمالی غزہ میں العودہ اور کمال عدوان اسپتالوں میں ادارے کے عہدیداروں کے دوروں میں یہ مشاہدہ کیا گيا ہےکہ اس وقت وہاں بچوں کو خوراک کی شدید قلت کا سامنا ہے اور وہ موت کے خطرے سے دوچار ہیں۔ انہوں نے لکھا کہ ان اسپتالوں کے دورے کے نتائج انتہائی خوفناک اور عبرتناک ہیں اور یہ مشاہدہ کیا گيا کہ خوراک کی کمی کے باعث ان دو اسپتالوں میں دس بچوں کی موت ہوچکی ہے اور ان دونوں ہسپتالوں میں غذائی قلت بہت زیادہ ہے، اور ان کی عمارتیں اور تنصیبات بھی اسرائیلی فوج کے حملوں میں تباہ ہو گئی ہیں۔