Raza Musani 
غزہ : غزہ کی بلدیات نے خبردار کیا ہے کہ ایندھن کی سنگین قلت سے خدمات کا نظام تباہی کے دہانے پر پہنچ چکا ہے۔ اتحاد بلدیاتِ غزہ کی جانب سے جاری بیان میں بلدیہ خان یونس کے سربراہ علاء البطہ نے کہا کہ جنگ بندی کے بعد پچاس دن میں جو معمولی سا ایندھن غزہ تک پہنچا وہ صرف پانچ دن کی ضروری سرگرمیوں کے لیے بھی ناکافی ہے۔ انہوں نے کہا کہ اسرائیل کی جانب سے ضروری مقدار میں ڈیزل کی آمد روک دینے کے بعد ایندھن کے تباہ کن بحران نے بنیادی خدمات کو مکمل طور پر مفلوج کرنے کے خطرے میں ڈال دیا ہے اور صورت حال لمحہ بہ لمحہ بگڑ رہی ہے۔ انہوں نے کہا کہ اس قلت کے باعث سڑکوں کی بحالی، ملبہ ہٹانے اور بے گھر افراد کی نقل و حرکت میں سہولت پیدا کرنے جیسے اہم ترین کام بری طرح متاثر ہو رہے ہیں۔ بلدیات نے خبردار کیا کہ اس بحران نے وہ تمام فوری انسانی خدمات معطل کر دی ہیں جن پر پناہ گزینوں کی بقا اور شہریوں کی زندگی کا دارومدار ہے۔
