Raza Musani 
بنوں : سیکیورٹی فورسز نے بنوں کینٹ پر فتنہ الخوارج کا دہشت گردی کا حملہ ناکام بناتے ہوئے 6 خوارج کو جہنم واصل کر دیا۔
سیکیورٹی ذرائع کے مطابق افطار کے وقت دہشت گردوں نے بنوں کینٹ میں داخل ہونے کی ناکام کوشش کی، دہشت گردوں نے بارود سے لدی 2 گاڑیاں بنوں کینٹ کی دیوار سے ٹکرا دیں، خوارج نے بازار میں رش اور سیکیورٹی فورسز کی کارروائی ہونے سے گاڑیاں گھبراہٹ میں دیوار سے ٹکرائیں۔ ذرائع نے بتایا کہ دہشت گردوں کی بارود سے بھری گاڑیوں کے دھماکے سے قریبی مسجد بھی شہید ہوگئی، دھماکے سے قریبی گھر کی چھت گرنے سے 12 شہری شہید اور 30 زخمی ہونے کی اطلاعات ہیں۔
سیکیورٹی ذرائع کا کہنا ہے کہ مختلف انٹری پوائنٹس پر موجود سیکیورٹی عملے نے 6 خوارج کو جہنم واصل کر دیا، باقی خارجی دہشت گردوں کو محصور کر لیا گیا ہے۔ ذرائع نے مزید کہا کہ افطار کے وقت معصوم شہریوں اور مسجد کو نشانہ بنایا گیا، حملہ اس بات کی غمازی کرتا ہے کہ خارجیوں کا اسلام سے کوئی تعلق نہیں، فورسز کا تمام خوارج کے خلاف کلین اپ آپریشن جاری ہے۔
