سعودی عرب اور لبنان کا تعاون کو مضبوط بنانے پر اتفاق

ریاض : سعودی عرب اور لبنان نے تعاون کو مضبوط بنانے اور علاقائی و بین الاقوامی معاملات پر موقف کو ہم آہنگ کرنے کی اہمیت پر زور دیا ہے۔ لبنانی صدر جوزف عون کے دورہ سعودی عرب اور ولی عہد شہزادہ محمد بن سلمان سے ملاقات کے بعد مشترکہ اعلامیہ جاری کردیا گیا۔ اعلامیہ کے مطابق دونوں ممالک نے طائف معاہدے کے مکمل نفاذ، متعلقہ بین الاقوامی قراردادوں پر عمل درآمد اور ریاست کی مکمل خودمختاری کو پورے لبنانی علاقے پر لاگو کرنے پر اتفاق کیا۔ اعلامیہ میں اسلحہ کو صرف لبنانی ریاست کے تحت رکھنےاور قابض اسرائیلی فوج کے لبنانی علاقوں سے مکمل انخلا کی ضرورت پرزور دیا گیا ہے۔ فریقوں نے لبنانی معیشت کی بحالی اور اس کے موجودہ بحران سے نکلنے کی ضرورت پر اتفاق کیا اور شفافیت کے اصولوں کے مطابق لازمی قوانین کے نفاذ کے ساتھ بین الاقوامی سطح پر مطلوبہ اصلاحات کے آغاز پر زور دیا ہے۔