سعودیہ اور فرانس کا اسٹریٹجک تعلقات مضبوط بنانے پر اتفاق

پیرس: سعودی ولی عہد محمد بن سلمان اور فرانسیسی صدر ایمانویل میکخواں نے دوطرفہ اسٹریٹجک تعلقات مضبوط بنانے پر اتفاق کیا ہے۔ سعودی ولی عہد محمد بن سلمان گذشتہ روز تین روزہ دورے پر پیرس پہنچے تھے۔ جہاں ان کا پرتپاک استقبال کیا گیا۔ انہوں نے الیزے محل میں فرانس کے صدر سے ملاقات کی اور دورہ فرانس پر خوشی کا اظہار کیا۔ دونوں رہنماؤں نے سعودی عرب اور فرانس کے تاریخی اور اسٹریٹجک تعلقات اور تمام شعبوں میں انہیں جدید خطوط پر استوار کرنے کے طریقوں کا جائزہ لیا۔ علاقائی و بین الاقوامی حالات پر نقطہ نظر اور اس حوالے سے کی جانے والی مشترکہ کوششوں میں تعاون کی حکمت عملی پر بھی تبادلہ خیال کیا گیا۔ روس، یوکرین جنگ اور دنیا بھر کے ملکوں پر اس کے اثرات زیر بحث آئے۔ سوڈان میں خانہ جنگی، ایران کے ایٹمی پلانٹ، عرب لیگ میں شام کی رکنیت کی بحالی جیسے موضوعات پر تبادلہ خیال کیا گیا۔ دونوں رہنماؤں نے لبنان میں جاری سیاسی بحران کے خاتمے پر بھی زور دیا۔