پابندیاں ثبوت ہیں کہ مذاکرات کا امریکی دعویٰ دھوکا ہے، ایران

تہران : ایران نے امریکی پابندیوں کی مذمت کرتے ہوئے کہاہے کہ نئی پابندیاں ثبوت ہیں کہ مذاکرات کا امریکی دعویٰ محض دھوکا ہے۔ایرانی وزارتِ خارجہ کے ترجمان اسماعیل بقائی نے کہا ہے کہ نئی امریکی پابندیاں قانون شکنی اور منافقت کا واضح ثبوت ہیں۔ امریکی پابندیاں عالمی قوانین اور آزاد تجارت کے اصولوں کی خلاف ورزی ہیں۔ ترجمان نے کہا کہ آزاد ممالک کے خلاف پابندیوں اور دباؤ کی پالیسی کا امریکی نشہ بین الاقوامی سطح پر قانون کی حکمرانی کی خلاف ورزی ہے اور بین الاقوامی امن و سلامتی کے لیے خطرہ ہے۔
واضح رہے کہ امریکا نے ایرانی شخصیات، آئل ٹینکرز اور تجارتی کمپنیوں پر پابندیاں لگا دی ہیں۔ ایران کے وزیرِ تیل محسن پاک نژاد بھی امریکی پابندیوں کی زد میں آنے والی شخصیات میں شامل ہیں۔