ہر چیز قربان، لیکن ہتھیار ہرگز نہیں ڈالیں گے، حزب اللہ سربراہ

بیروت : حزب اللہ کے سربراہ شیخ نعیم قاسم نے کہاہے کہ ہم ہر چیز قربان کرنے کو تیار ہیں لیکن ہتھیار ہرگز نہیں ڈالیں گے۔ شہید علماء کیلئے تعزیتی تقریب سے ویڈیو لنک سے خطاب میں شیخ نعیم قاسم نے کہا کہ اسرائیل کی کارروائیاں کھلی توسیع پسندی ہیں۔ لبنان ایک خطرناک اور توسیع پسند اسرائیلی جارحیت کا سامنا کر رہا ہے۔ ان کے مطابق اس کا مقابلہ ہر ممکن طریقے سے کیا جانا چاہئے۔ انہوں نے کہا کہ اسرائیلی جارحیت کا مقصد مزاحمت کو غیر مسلح کرنا نہیں بلکہ لبنان پر قبضہ اور نام نہاد گریٹر اسرائیل کے منصوبے کا آغاز ہے۔ یہ منصوبہ فلسطین سمیت مصر، اردن، شام اور لبنان کے حصوں پر مشتمل ہے۔‏
شیخ نعیم قاسم نے کہا ہے کہ لبنان نے اسرائیلی جارحیت کے خاتمے کے لیے سفارتی راستہ اختیار کیا ہے۔ تاہم امریکی اور اسرائیلی مداخلت کو کسی صورت قبول نہیں کیا جائے گا۔ ملک کے دفاعی معاملات اور مزاحمتی ہتھیاروں پر کوئی سمجھوتہ نہیں ہو سکتا۔ امریکا و اسرائیل ہمارے وجود کو ختم کرنا چاہتے ہیں لیکن ہم اپنا۔ اپنے عوام اور ملک کا دفاع کریں گے۔