روس کے یوکرین پر تابڑ توڑ حملے

کیف : روس کے میزائل حملوں نے اوڈیسا اور ڈونیٹسک کو ہلا کر رکھ دیا۔ یوکرین کی فوج کے مطابق روسی میزائلوں نے رات گئے بندرگاہ اوڈیسا میں شہری عمارتوں کو نشانہ بنایا۔ روس نے شہر پر چار کروز میزائل داغے، میزائل لگنے سے عمارتوں کو نقصان پہنچا۔ حملے میں تین افراد ہلاک اور 13 زخمی ہو گئے۔ دفاعی سسٹم نے دو میزائل اپنے اہداف کو نشانہ بنانے سے پہلے ہی تباہ کر دیے۔ روسی فوج نے ڈونیٹسک کے علاقے میں بھی میزائل حملہ کیا جس کے نتیجے میں تین افراد ہلاک ہوئے۔ جوابی کارروائی کے طور پر یوکرین کی افواج نے نووا کاخووکا کے رہائشی علاقے پر گولہ باری کی جس سے ایک شخص زخمی ہو گیا، زپوریزیا کے محاذ پر میزائل حملے میں ایک اعلیٰ روسی افسر ولادیمیر روگوف کی ہلاکت کی اطلاع ہے۔ صدر ولادیمیر زیلنسکی کا کہنا ہے کہ یوکرین اپنی سرزمین سے روسی برائی کو نکال باہر کرے گا۔ ہم اس درد کو کبھی معاف نہیں کریں گے جو روس نے ہماری سرزمین پر پہنچایا ہے۔