روس یوکرین جنگ، ٹرمپ اور پیوٹن مذاکرات پر رضامند

واشنگٹن: امریکی صدر ڈونلڈ ٹرمپ نے یوکرین سے متعلق تین سال سے جاری پالیسی کو تبدیل کرتے ہوئے روسی صدر ولادیمیر پیوٹن کے ساتھ جنگ بندی مذاکرات شروع کرنے پر اتفاق کیا ہے۔ ڈونلڈ ٹرمپ نے سوشل میڈیا پوسٹ میں کہا کہ انہوں نے اور پیوٹن نے فون پر طویل بات چیت کی ہے جس میں دونوں صدور نے تنازعہ کو ختم کرنے کے لیے مل کر بہت قریب سے کام کرنے کا عزم کیا ہے اور شاید وہ ذاتی طور پر ایک دوسرے کے ممالک میں ملاقات کریں گے۔ ٹرمپ نے اپنی پوسٹ میں لکھا کہ گفتگو میں ہم دونوں نے اتفاق کیا کہ روس اور یوکرین جنگ میں ہونے والی لاکھوں اموات کو روکنا چاہیے۔
امریکی صدر نے یوکرین کے ہم منصب ولادی میر زیلنسکی سے ٹیلی فونک رابطہ کرکے روسی صدر کیساتھ گفتگو سے آگاہ کردیا ہے۔ یوکرین کے صدارتی دفتر سے بھی ٹرمپ اور زیلنسکی کے درمیان ٹیلی فونک رابطے کی تصدیق کی گئی۔ یوکرینی صدر زیلنسکی کا کہنا تھا کہ یوکرین سے زیادہ کوئی امن نہیں چاہتا۔ امریکا کے ساتھ مل کر ہم روسی جارحیت کو روکنے اور دیرپا اور قابل اعتماد امن کو یقینی بنانے کے لیے اپنے اگلے اقدامات کا خاکہ تیار کر رہے ہیں۔