حکمران امریکا کے خوف سے ایران سے تیل وگیس نہیں لیتے، علامہ راجہ ناصر عباس

راولپنڈی : چیئرمین مجلس وحدت مسلمین پاکستان علامہ راجہ ناصر عباس جعفری نے کہا کہ امریکہ کی خوشنودی کے لیے چیئرمین پی ٹی آئی کو ہٹا کر آزمائے ہوئے ان ناکام کرپٹ افراد کو عوام پر مسلط کر دیا گیا، جن پر کرپشن کے سنگین مقدمات تھے۔ یہی سب سے بڑی ناکامی ہے۔ علامہ راجہ ناصر عباس جعفری نے کہا کہ ہمارے ملک میں بجلی ، پٹرول انتہائی مہنگی کر دی گئی ہے۔ ایران سے ہمسایہ ممالک کو پٹرول ،گیس سستے داموں مل رہی ہے۔ ہم امریکا کی ناراضگی کے ڈر سے ایران کے ساتھ تجارتی روابط رکھنے سے کتراتے ہیں۔ امریکا راضی رہے عوام چاہے تباہ و برباد ہو جائیں۔ آئی ایم ایف سے قرض لے کے یہ موقع پر ست سیاست دان خود کھا گئے ہیں۔ انہوں نے کہا کہ جو قوم آج بجلی کے بلوں کو جلا رہی ہے اگر ریاست نے ان کے حقوق کی پاسداری نہ کی تو وہ ان جگہوں پر جا کراپنے غصے کا اظہار کریں گے جہاں سے بل جاری کئے جاتے ہیں۔ انہوں نے کہا کہ نوجوانوں کو دانستہ طور پر پاکستان سے مایوس کیا جا رہا ہے۔ لوگ پاکستان کو چھوڑ کر جا رہے ہیں۔ کاش مقتدر اور طاقتور طبقہ انسانی اقدار کو بھی ملحوظ خاطر رکھتا۔