شام میں امریکا کے دو فوجی اڈوں پر راکٹ حملہ، ایک فوجی زخمی

دمشق: شام میں امریکا کے دو فوجی اڈے راکٹ حملوں کی زد میں آگئے۔ شام کے شمال مشرقی صوبے دیر الزور میں آئل فیلڈز العمر اور گیس فیلڈ کونیکو میں قائم امریکی اڈوں کوراکٹوں سے نشانہ بنایا گیا۔ میڈیا رپورٹ کے مطابق دونوں امریکی اڈوں پر 20 سے زائد راکٹ داغے گئے۔ راکٹ حملوں کے بعد امریکی ہیلی کاپٹروں نے کونیکو گیس فیلڈ پر پرواز کی۔ ایک امریکی فوجی اہلکار نے الجزیرہ نیٹ ورک کو بتایا کہ مشرقی شام میں امریکی اڈوں میں سے ایک پر 8 میزائل داغے گئے۔ حملے میں ایک امریکی فوجی زخمی ہوا۔ واشنگٹن اس راکٹ حملے کے نقصان کا اندازہ لگا رہا ہے۔ اس سے پہلے امریکی فوج نے شامی فوج اور ایرانی پاسداران انقلاب کے مبینہ ٹھکانوں کو نشانہ بنایا تھا جس میں 11 افراد جاں بحق اور کئی زخمی ہوگئے تھے۔