غزہ میں جنگ کی واپسی تباہ کن ہوگی، اقوام متحدہ

نیویارک : اقوام متحدہ کے سربراہ انتونیو گوتریس نے خبردار کیاہے کہ غزہ میں جنگ کی واپسی تباہ کن ہوگی۔ سکریٹری جنرل کے ترجمان اسٹیفن دوجارک کی جانب سے جاری بیان میں کہا گیاہے کہ جنگ کی واپسی کو روکنے کے لیے تمام کوششیں کی جانی چاہئیں تمام جماعتیں زیادہ سے زیادہ تحمل کا مظاہرہ کریں اور اگلے مرحلے پر آگے بڑھنے کا راستہ تلاش کریں۔ بیان میں کہاگیا ہے کہ مستقل جنگ بندی اور تمام یرغمالیوں کی رہائی جنگ میں اضافے کو روکنے اور شہریوں کے لیے مزید تباہ کن نتائج سے بچنے کے لیے ضروری ہے۔ انہوں نے کہا کہ اقوام متحدہ تشدد کے خاتمے کے لیے تمام کوششوں کی حمایت کے لیے تیار ہے۔