سعودی عرب سے تعلقات فلسطینی ریاست سے مشروط نہیں ہونگے، نیتن یاہو

تل ابیب : صیہونی وزیرِاعظم بنیامین نیتن یاہو کا کہنا ہے کہ سعودی عرب کے ساتھ تعلقات کی بحالی ممکن ہے، مگر یہ کسی بھی صورت فلسطینی ریاست کے قیام سے مشروط نہیں ہوگی۔ اسرائیلی میڈیا کو انٹرویو میں نیتن یاہو نے کہا کہ سعودی عرب کے ساتھ تعلقات کی بحالی فلسطینی ریاست کے بغیر بھی آگے بڑھ سکتی ہے۔ اور اگر اس عمل میں کوئی شرط رکھی گئی تو پھر فلسطینی ریاست ہرگز قائم نہیں ہوگی۔ انہوں نے سعودیہ سے تعلقات کی بحالی سے متعلق پیشرفت پر محتاط امید کا اظہار کیا اور کہا کہ بیرونی بیانات اور اندرونی گفتگو ہمیشہ یکساں نہیں ہوتے۔ انہوں نے کہا کہ امریکی وزیرِ خارجہ مارکو روبیو نے یقین دہانی کرائی ہے کہ واشنگٹن اسرائیلی فوجی برتری برقرار رکھے گا۔ خصوصاً سعودی عرب کو ایف تھرٹی فائیو طیاروں کی ممکنہ فروخت کے معاملے میں۔ انہوں نے کہا کہ ترکی کو ایف تھرٹی فائیو دینے کی اسرائیلی مخالفت برقرار ہے۔