حزب اللہ کو دہشت گرد قرار دینے سے اقدامات اور مقاصد میں کوئی تبدیلی نہیں آئے گی، سید حسن نصر اللہ

بیروت : حزب اللہ کے سیکریٹری جنرل حسن نصراللہ نے کہا ہے کہ آسٹریلیا کی جانب سے حزب اللہ کو دہشت گرد تنظیم قرار دینے کے فیصلے سے اسرائیلی خطرات کے خلاف مزاحمت کے عزم پر کوئی اثر نہیں پڑے گا۔ حزب اللہ کو دہشت گردوں کی فہرست میں شامل کرنے سے اسکے اقدامات اور مقاصد میں کوئی تبدیلی نہیں آئے گی۔ لبنان کے یوم استقلال کے موقع پر تقریب سے خطاب میں حسن نصر اللہ نے بعض عرب ممالک کی طرف سے فلسطینیوں کے ساتھ خیانت و غداری اور ان کے اسرائیل کے ساتھ سفارتی تعلقات کی مذمت کرتے ہوئے کہا کہ بعض عرب ممالک کے بعد اب مراکش نے بھی اسرائیل کے ساتھ سفارتی تعلقات قائم کرلئے ہیں۔عرب حکمرانوں کے چہرے سے اسلام کی نقاب اتر گئی ہے عرب حکمرانوں کی فلسطینی مسلمانوں اور بیت المقدس کے ساتھ غداری اور خیانت سب پر آشکار ہوگئی ہے۔ انہوں نے دوٹوک الفاظ میں اعلان کیا کہ جب تک لبنان کو اسرائیل کی جانب سے خطرات لاحق رہیں گے، ملکی آزادی و خود مختاری کے تحفظ کے لئے اسکے خلاف جد و جہد جاری رہے گی۔ ان کا کہنا تھا کہ شمالی افریقہ میں اسرائیل کی علی الاعلان موجودگی اس علاقے کے عرب ممالک منجملہ الجزائر کے لئے خطرات کا باعث ہے۔ 2000 میں غاصب صیہونی ٹولے اسرائیل سے لبنانی زمین کی آزادی کے نتیجے میں اس ملک کو خودمختاری اور ارضی سالمیت کا تحفہ ملا ہے۔