Raza Musani 
تہران : ایران اور سعودی عرب نے خطے کے محفوظ مستقبل کیلئے علاقائی استحکام کو اہم ضرورت قرار دیا ہے۔ سعودی وزیر خارجہ شہزادہ فیصل بن فرحان گذشتہ روز تاریخی دورے پر تہران پہنچے اور ایرانی ہم منصب حسین امیر عبد اللہیان سے ملاقات کی اور اعلیٰ سطح کے اجلاس میں شرکت کی بعد میں مشترکہ نیوز کانفرنس میں شہزادہ فیصل نے کہاکہ سعودی عرب خلیجی علاقے میں ایران کے ساتھ مل کر بحری سیکیورٹی کو بڑھانا چاہتا ہے۔ انہوں نے ایک دوسرے کے اندرونی معاملات میں عدم مداخلت اور باہمی احترام پر زور دیا۔ شہزادہ فیصل نے کہاکہ تہران میں سعودی سفارت خانہ اور مشہد میں قونصل خانہ عیدالاضحیٰ کے بعد اپنا کام شروع کر دیں گے۔ ایرانی وزیر خارجہ حسین امیر عبداللھیان نے شہزادہ فیصل بن فرحان کے دورہ ایران کو دوطرفہ تعلقات کے استحکام و فروغ کے لیے انتہائی اہم قرار دیا۔
