امریکا میں گذشتہ سال مسلم مخالف واقعات میں ریکارڈ اضافہ

واشنگٹن: کونسل آن امریکن اسلامک ریلیشنز نے ایک رپورٹ شائع کی ہے، جس میں کہا گیا ہے کہ گذشتہ سال مسلمانوں کے خلاف حملوں اور ان کے ساتھ امتیازی سلوک کی مجموعی طور پر 8061 شکایتیں درج کرائی گئیں جو کہ 2022 کے مقابلے میں 56 فیصد زیادہ ہیں۔ رپورٹ کے مطابق صرف اکتوبر سے دسمبر کے دوران 3600 واقعات درج کرائے گئے۔ غزہ اسرائیل جنگ کی وجہ سے اسلاموفوبیا اور فلسطین مخالف جذبات میں اضافہ ریکارڈ کیا گیاہے۔ سی اے آئی آر نے اپنی رپورٹ میں جن واقعات کا ذکر کیا ہے ان میں اکتوبر میں ایلی نوائے میں چھ سالہ فلسطینی امریکی وادیہ الفیوم کو چاقو مار کر قتل کرنے، ورماونٹ میں نومبر میں تین فلسطینی نژاد طلبہ کو گولی مارنے اور ٹیکساس میں فروری میں فلسطینی امریکی کو چاقو مارنے کے واقعات بھی شامل ہیں۔ سی اے آئی آر کا کہنا ہے کہ 2023 میں سب سے زیادہ شکایتیں امیگریشن اور پناہ گاہوں، روزگار میں امتیازی سلوک، منافرت پر مبنی جرائم اور تعلیم کے شعبے میں تفریق کے زمروں میں درج کی گئیں۔