بات چیت کے لئے تیار، لیکن اپنی ایٹمی کامیابیوں پر کوئی سمجھوتہ نہیں کریں گے، ایرانی صدر

تہران : ایرانی صدر مسعود پزشکیان نے کہا کہ ہم امن اور سلامتی کے خواہاں اور بات چیت کے لئے تیار ہیں، لیکن اپنی ایٹمی کامیابیوں پر کوئی سمجھوتہ نہیں کریں گے۔ قومی جوہری توانائی کے دن کی مناسبت سے منعقدہ تقریب سے خطاب میں مسعود پزشکیان نے کہا کہ دشمن نے ہمارے سائنس دانوں کو قتل کیا تاکہ اس ملک میں کوئی ایسا شخص نہ رہے جو ترقی کی راہ ہموار کر سکے۔ صدر پزشکیان نے مزید کہا کہ دشمنوں نے یہ ثابت کرنے کے لئے کہ ہم نہیں کر سکتے، ہمارے با صلاحیت دانشوروں اور سائنسدانوں کو قتل کیا، جب کہ وہ اس بات سے بے خبر ہیں کہ سائنسدانوں کی شہادتوں سے ایران ہرگز کمزور نہیں ہوگا۔ ایرانی صدر نے کہا کہ ہم جنگ کے خواہاں نہیں ہیں، تاہم اپنے سائنس دانوں کی محنت اور طاقت کے ساتھ کسی بھی جارحیت کا مقابلہ کریں گے۔