مذاکرات کیلئے تیار ہیں لیکن صرف الیکشن کے معاملے اور فریم ورک پر، عمران خان

لاہور: پاکستان تحریک انصاف کے چیئرمین عمران خان نے کہا ہے کہ پی ٹی آئی مذاکرات کیلئے تیار ہے لیکن آئین اور قانون سے ہٹ کر کوئی بات نہیں ہوگی اور بات چیت صرف الیکشن کے معاملے اور فریم ورک پر ہوں گے۔ لاہور زمان پارک میں سینئر صحافیوں اور پی ایف یو جے کے وفد سے ملاقات میں گفتگو کرتے ہوئے عمران خان نے کہا کہ پاکستانی فوج میری فوج ہے اور پاکستان ہم سب کا ہے، عدلیہ کی آزادی اور آئین پر کوئی سمجھوتہ نہیں ہے۔انہوں نے کہا کہ ملک کے تمام مسائل کا حل آزادانہ الیکشن ہی ہیں۔ عمران خان کا کہنا تھا کہ جمہوریت کیلئے تحریک انصاف ہر آخری حد تک جائے گی، وکلاء کی تحریک میں پوری قوم ان کے ساتھ ہو گی۔چیئرمین پی ٹی آئی نے کہا کہ مضبوط پاکستان کیلئے مضبوط فوج انتہائی ضروری ہے، قومی ادارے اور ان کی مضبوطی ہماری اولین ترجیح ہے۔