امداد کی فراہمی میں تیزی، پہلے دن 630 ٹرک غزہ میں داخل

غزہ : جنگ بند ہوتے ہی غزہ میں امداد کی فراہمی میں تیزی آگئی ہے۔پہلے دن چھ سو تیس ٹرک غزہ میں داخل ہوئے۔
اقوام متحدہ کے عہدیدار فلیچر نے کہا ہے کہ فائر بندی کے پہلے دن انسانی امداد کے 630 سے زائد ٹرالر علاقے میں بھیج دیئے گئے ہیں۔ ان میں سے کم از کم 300 ٹرالر غزّہ کے شمال میں بھیج دیئے گئے ہیں۔ امداد کا بِلاتاخیر علاقے میں پہنچنا ضروری ہے۔ انہوں نے کہاکہ پندرہ ماہ کی مسلسل جنگ کے بعد انسانی ضروریات حیران کن ہیں۔ امداد کی فراہمی میں اب مزید وقت برباد نہیں کیا جانا چاہئے۔ انروا کے سربراہ فلپ لازارینی نے کہا ہے کہ جنگ بندی کے بعد امداد اور کچھ تجارتی سامان کا بہاؤ آسانی سے ہوا۔ جنگ بندی کو برقرار رہنا چاہیے اور معاہدے کے تمام عناصر پر عمل درآمد ہونا چاہیے۔یہ سب کے لیے دیرپا امن اور استحکام کی جانب صحیح سمت میں ایک قدم ہے۔