فلسطینیوں سے یکجہتی کیلئے دنیا بھر میں ریلیاں اور مظاہرے

لندن : غزہ پر اسرائیلی حملوں کیخلاف دنیا بھر میں فلسطینیوں کیساتھ اظہار یکجہتی کیلئے ریلیاں نکالی گئیں اور احتجاجی مظاہرے کئے گئے۔ صیہونی جارحیت کیخلاف مشرق وسطیٰ سے لیکر ایشیا ، یورپ ، امریکا اور مغربی ممالک میں بھی فلسطینیوں کے حق میں لاکھوں افراد سڑکوں پر آگئے۔ مغربی ممالک میں فلسطینیوں کے حق سب سے بڑی ریلی وسطی لندن میں بی بی سی کے براڈ کاسٹنگ ہاؤس سے وائٹ ہال تک نکالی گئی جس میں ہزاروں افراد شریک ہوئے شرکا ء نے فلسطین کے جھنڈے اٹھا رکھے تھے، ’آزاد فلسطین‘ کے نعرے لگائے گئے۔برطانوی پولیس نے ریلی کے اختتام پر 7 مظاہرین کو گرفتار کرلیا ۔لندن ، مانچسٹر، لیورپول، برسٹول، کیمبرج، ناروچ، کوینٹری اور سوانسی اور دیگر شہروں میں بھی ریلیاں نکالی گئیں۔ نیویارک سٹی میں بھی ہزاروں افراد’’ آزاد فلسطین‘‘ کے نام سے احتجاجی مارچ میں شریک ہوئے ۔ اٹلی کے دارالحکومت روم میں فلسطینیوں کے حق میں ہزاروں افراد نے مظاہرہ کیا۔ ڈنمارک کے شہر برابانڈ اور برلن میں بھی فلسطینیوں کے حق میں مظاہرے کئے گئے ۔ ترکیہ کے مختلف شہروں میں احتجاج کیاگیا۔ مظاہروں میں اسرائیلی جارحیت کی مذمت کی گئی۔ فلسطین کے مقبوضہ شہر نابلس میں ہزاروں نوجوان غزہ کے حق میں سڑکوں پر نکل آئے جہاں فورسز اور مظاہرین میں جھڑپیں بھی ہوئیں۔