غزہ پر بموں اور میزائلوں کی بارش، مزید 30 فلسطینی شہید، متعدد زخمی

غزہ : صیہونی فوج کے غزہ پر تازہ حملوں میں تیس افراد شہید اور کئی زخمی ہوگئے۔ صیہونی فوج نے مسلسل 42 ویں روز بھی غزہ پر بموں اور میزائلوں کی بارش جاری رکھی۔جنگی طیاروں نے رفح ۔ خان یونس اور جبالیہ میں رہائشی عمارات اور مکانات کو نشانہ بنایا۔ تازہ حملوں میں تیس فلسطینی شہید اور متعدد زخمی ہوگئے۔ جبکہ عمارتیں ملبے کا ڈھیر بن گئیں۔ صیہونی فوج کی الشفا اسپتال میں تیسرے دن بھی کارروائی جاری ہے۔ لیکن صیہونی فوج کو کوئی شواہد نہیں مل سکے کہ اسپتال کو حماس اپنے کمانڈ سینٹر کے طور پر استعمال کررہی تھی۔
اسرائیلی بلڈوزروں اور ٹینکوں نے خصوصی سرجری والی عمارت، دواؤں، طبی آلات کے گودام کو دھماکے سے اُڑا دیا۔ اسرائیلی فوجی ایمرجنسی کے باہر رکھی لاشیں اٹھا کر لے گئے۔ آدھر اسرائیلی فوج نے الشفا کے بعد الاہلی اسپتال کو بھی گھیرے میں لے لیا. 140 گنجائش والے اسپتال میں 500 مریض داخل ہیں، جبکہ سینکڑوں بے گھر فلسطینیوں نے بھی پناہ لی ہوئی ہے۔
ادھر انڈونیشین اسپتال میں ایندھن اور طبی سہولیات ختم ہونے سے کام رُک گیا ہے۔