پی ٹی آئی کا دفتر ایک بار پھر سیل، ترجمان رؤف حسن کا جسمانی ریمانڈ منظور

اسلام آباد: پاکستان تحریک انصاف کا مرکزی دفتر ایک بار پھر سیل کر دیا گیا۔ اسلام آباد کی انتظامیہ نے دفتر کو سربہمر کرنے کی وجہ دفتر میں آتشزدگی سے نمٹنے کے انتظامات نہ ہونے کو قرار دیا ہے۔ ادھر مرکزی دفتر سے گرفتار کئے گئے مرکزی ترجمان رؤف حسن کو دورزہ جسمانی ریمانڈ پر وفاقی تحقیقاتی ادارے ایف آئی اے کے حوالے کردیا گیا۔ رؤف حسن پر الزام ہے کہ ان کی سربراہی میں باقاعدہ میڈیا سیل قائم ہے جو پاکستان کے امن اور سالمیت کو سبوتاژ کرنے کیلئے سوشل میڈیا کا استعمال کرتا ہے۔ حکومت کی جانب سے چھاپوں۔ گرفتاریوں اور بانی پی ٹی آئی کی رہائی کیلئے علامتی بھوک ہڑتال شروع کردی ہے۔ پارلیمنٹ ہاؤس کے سامنے بھوک ہڑتال میں قومی اسمبلی کے تمام ارکان نے حصہ لیا۔ مطالبات کی منظوری تک روزانہ بھوک ہڑتال کی جائے گی۔ پی ٹی آئی چیئرمین بیرسٹر گوہر نے کہا ہے کہ ہمارے احتجاج کا مقصد ناانصافی اور زیادتی ختم کرنا ہے، ہمارے احتجاج کا مقصد بانی پی ٹی آئی کو آزادی دلانا ہے۔