بانی پی ٹی آئی کی عدالت میں ویڈیو لنک کے ذریعے پیشی

اسلام آباد: نیب ترامیم کے خلاف انٹرا کورٹ اپیلوں پر سماعت کے دوران بانی پی ٹی آئی عمران خان کو بذریعہ ویڈیو لنک پیش کیا گیا۔ لیکن مقدمہ کی سماعت براہ راست نشر نہیں کی گئی تاہم عمران خان کے ویڈیو لنک پر سپریم کورٹ میں پیش ہونے کی تصویر وائرل ہوگئی۔ جسے چند گھنٹوں میں ہی ایکس۔ فیس بک ۔ یوٹیوب اور دیگر سوشل میڈیا سائٹس پر لاکھوں افراد نے دیکھا۔ عمران خان کی پیشی کے پیش نظر سپریم کورٹ کی ویب سائٹ پر دن گیارہ بجے کے بعد ایک دم ٹریفک بڑھ گیا اور دیکھتے ہی دیکھتے سبسکرائزر کی تعداد ایک لاکھ سے تجاوز کرگئی۔ تاہم سماعت براہ راست نہ دکھانے پر یہ ٹریفک منٹوں میں غائب ہوگیا۔ ادھر عدالت میں عمران خان کی تصویر بنانے والے کو پکڑنے کیلئے سپریم کورٹ انتظامیہ سرگرم ہوگئی اور سی سی ٹی وی ویڈیو کی جانچ شروع کردی گئی ہے۔ عدالت میں تصویر بنانا کورٹ روم رولز کی خلاف ورزی ہے۔