فرانس میں احتجاج شدت اختیار کرگیا، دائرہ بیلجئم تک پھیل گیا

پیرس : فرانس میں پولیس فائرنگ سے نوجوان کی ہلاکت پر مظاہرے شدت اختیار کرگئے۔ احتجاج کا دائرہ بیلجیئم تک پھیل گیا۔ فرانس کے بڑے شہروں میں تیسری رات ہنگامہ آرائی کا سلسلہ جاری رہا۔ پیرس اور اس کے مضافات کے علاوہ مارسیلی، لیون، پاؤ، ٹولوز اور لِلی میں احتجاج کے دوران پولیس سے جھڑپوں اور آتشزدگی کے واقعات پیش آئے۔ اس دوران درجنوں گاڑیوں کو آگ لگادی گئی اور بعض دکانوں میں لوٹ مار بھی کی گئی۔ نانتیرے شہر میں بینک اور للی سینٹ ڈینس میں ٹاؤن ہال کو آگ لگادی گئی۔ فرانس کے دوسرے بڑے شہر مارسیل میں سیاحتی مقام پر نوجوانوں اور پولیس میں شدید جھڑپیں ہوئیں۔ پولیس نے آنسو گیس کے گولے فائر کیے۔ ملک بھر میں احتجاج کو روکنے کیلئے 40,000 پولیس افسران کو تعینات کیا گیا ہے۔ پولیس نے چار سو مظاہرین کو گرفتار کرلیا ہے جبکہ نوجوان پر گولی چلانے والے پولیس اہلکار سے تحقیقات کا آغاز کردیا گیا ہے۔ ادھر بیلجیئم کے دارالحکومت برسلز میں بھی نوجوانوں اور پولیس افسران کے درمیان جھڑپیں ہوئی۔ پولیس نے 10 افراد کو گرفتار کیا گیا، اور شہر کے کچھ پبلک ٹرانسپورٹ آپریشنز کو بند کر دیا گیا۔