Raza Musani 
مجلس وحدت مسلمین پنجاب کے صوبائی سیکریٹری جنرل علامہ عبدالخالق اسدی نے ملت جعفریہ کے علمائے کرام اور عوام سے اپیل کی ہے کہ کورونا کی پانچوں لہر کو نظر انداز نہ کیا جائے۔ انہوں نے کہا کہ کورونا وائرس کے مضر اثرات نے پوری دنیا کو معاشی تباہی کے دہانے پر لاکھڑا کیا ہے، کسی بڑے انسانی المیے سے محفوظ رہنے کیلئے ان حفاظتی اقدامات پر سختی سے عمل کرنا ہوگا جن کا صحت کے عالمی ادارے تقاضا کر رہے ہیں۔ کورونا ویکسین کے حوالے سے منفی پروپیگنڈہ کرنے والے ملک و قوم سمیت انسانیت کے دشمن ہیں۔ اپنی نسلوں کو صحت مند رکھنے اور ان کے تحفظ کیلئے ویکسین کا لگنا انتہائی ضروری عمل ہے۔
انہوں نے کہا کہ مجلس وحدت مسلمین نے گزشتہ لہروں کے دوران کورونا ویکسین کی ضرورت کے متعلق بھرپور انداز میں آگاہی مہم شروع کی اور اس کے بہترین نتائج بھی حاصل کیے۔ اب دوبارہ اس ہی مہم کا آغاز کیا جا رہا ہے. اس سلسلے میں ایم ڈبلیو ایم پنجاب سیکرٹریٹ میں لاہور بھر کے علمائے کرام کیلئے ہیلتھ اینڈ ایجوکیشن ڈیپارٹمنٹ کے ماہرینِ صحت کے ہمراہ ایک خصوصی نشست کا اہتمام کیا گیا ہے۔ ایم ڈبلیو ایم کے ضلعی دفاتر کو اس سلسلے میں موثر اقدامات کی ہدایات جاری کر دی گئی ہیں۔ انہوں نے آئمہ جمعہ سے بھی درخواست کی ہے کہ وہ اپنی نماز جمعہ کے خطبات میں کورونا ویکسین لگانے پر زور دیں اور عوام کو بتایا جائے کہ اگر کسی شخص کی کوتاہی کے باعث مرض میں اضافہ ہوتا ہے تو اس کا گناہ اس کے کندھوں پر ہو گا۔
