اسرائیلی جیلوں میں قیدیوں سے جانوروں سے بدتر سلوک

رام اللہ : اسرائیلی جیلوں سے رہا فلسطینیوں نے جانوروں سے بدتر سلوک روا رکھنے سے پردہ اٹھادیا۔ فلسطینیوں نے اسرائیلی جیلوں کی صورتحال کو امریکی جیل گوانتاناموبے سے بھی بدتر قرار دیا۔ قیدیوں نے بتایا کہ ہمیں کئی کئی دن کھانے کو کچھ نہیں ملتا تھا، ہم بھوک سے نڈھال تھے، اور ہمیں ہر وقت مارا پیٹا جاتا تھا۔ ادویات تک نہیں دی جاتی تھیں۔ قیدیوں نے اپنے دکھ بھرے حالات بتاتے ہوئے کہا کہ ہم دنیا سے پوری طرح الگ کر دیے گئے تھے۔ بوڑھوں، بچوں اور بیماروں پر بھی کوئی رحم نہیں کیا جاتا۔
قیدیوں کے ساتھ بدسلوکی کے بارے میں رہا ہونے والوں غتفصیل سے بتایا کہ اسرائیلی اسپیشل فورسز رات 2 بجے ہمارے سیلوں پر دھاوا بولتی تھیں، ہم پر ناقابل برداشت ٹھنڈے پانی کا چھڑکاؤ کیا جاتا تھا اور بغیر کسی وجہ کے آنسو گیس چھوڑا جاتا تھا۔ اسرائیلی فوجی ہمیں گالیاں دیتے تھے اور کہتے تھے کہ تمہیں زندہ نہیں رہنا چاہیے بلکہ قتل کر دینا چاہیے، تم لوگ اسی کے مستحق ہو۔