Raza Musani 
بغداد : عراقی حزب اللہ بریگیڈز نے قومی سلامتی کے مشیر قاسم الاعرجی کی جانب سے وزیراعظم مصطفیٰ الکاظمی پر حملے کی ابتدائی تحقیقاتی رپورٹ کو مشکوک قرار دے دیا۔ گروپ کے ترجمان ابو علی العسکری نے ڈرونز کے ذریعے کی گئی اس کوشش کو بے بنیاد قرار دیتے ہوئے کہا کہ سیکیورٹی اور سیاسی قیادت کی اکثریت بلکہ بغداد میں بڑے ممالک کے سفرا بھی یہ جانتے ہیں کہ وزیراعظم کےگھر کونشانہ بنانے کی نام نہاد کارروائی قطعاً بے بنیاد ہے۔ اس جعلی دھماکے کے وقت مصطفی الکاظمی گھر میں موجود ہی نہیں تھے۔ العسکری نے تحقیقاتی کمیٹی سے مطالبہ کیا کہ گھر کے اندرونی کیمروں کے ذریعے یہ ثابت کیا جائے کہ جس شخصیت کو نشانہ بنانا تھا وہ اس جعلی دھماکے کے وقت گھر میں تھی۔ ترجمان نے مزید استفسار کیا کہ "حملے میں زخمی ہونے والے کہاں گئے اور مقامی آبادی کی گواہیاں کہاں ہیں؟۔ مصطفیٰ الکاظمی پر حملے کا الزام حزب اللہ بریگیڈز اور عصائب اہل الحق پر عائد کیا گیا تھا۔
