ثالثوں سے مثبت مذاکرات، حماس کا یرغمالیوں کی رہائی کے فیصلے پر عمل درآمد کا اعلان

قاہرہ: حماس نے جنگ بندی معاہدے کے تحت اسرائیلی یرغمالیوں کی رہائی کے فیصلے پر عمل درآمد کرنے کا اعلان کردیا۔ٹیلی گرام پر شائع بیان میں حماس نے کہا ہے کہ اس کے وفد نے قاہرہ میں مصری اور قطری ثالثوں کے ساتھ بات چیت کی ہے جو مثبت رہی۔ گفتگو میں جنگ بندی کے معاہدے کی شرائط پر توجہ مرکوز کی گئی ہے۔ بیان میں کہا گیا ہے ثالثوں نے معاہدے پرعملدرآمد میں حائل رکاوٹوں کو دور کرنے کی یقین دہانی کرائی ہے۔ ملاقات میں فلسطینیوں کےلیے رہائش، خیمے، طبی سامان، ایندھن اور دیگر امداد کی مسلسل فراہمی پر بھی بات چیت کی گئی۔ حماس نے اپنے بیان میں مزید کہا کہ وہ طے شدہ جنگ بندی معاہدے کے تحت طے کردہ ٹائم ٹیبل کے تحت قیدیوں کے تبادلے سمیت دیگر چیزوں پر عمل درآمد کریں گے۔