فلسطینیوں کی مزاحمت، صیہونیوں میں نفسیاتی امراض کی ادویات کے استعمال میں اضافہ

تل ابیب: عبرانی ذرائع ابلاغ نے اعتراف کیا ہے کہ حالیہ مہینوں میں غاصب صیہونیوں میں اینٹی ڈپریشن اور گولیوں کے استعمال میں شدت سے اضافہ ہوا ہے۔ رپورٹ کے مطابق جغرافیائی کشیدہ سیاسی صورتحال اور کورونا وائرس کے بعد کے مشکل حالات، سیاسی اور معاشی خراب صورتحال کے پیش نظر بڑھتی ہوئی تشویش کے باعث اسرائیل میں اینٹی ڈپریسنٹ ادویات کی مقدار میں شدت سے اضافہ ہوا ہے۔ رپورٹ میں طبی اور مختلف اسپتالوں کے اسپیشلسٹ ڈاکٹروں کے حوالے سے بتایا گیا ہے کہ موجودہ صورتحال میں، تین اسرائیلیوں میں سے کم از کم ایک اسرائیلی ذہنی اور نفسیاتی مسائل کا شکار ہے اور یہ مسائل اسرائیلی خواتین میں بہت زیادہ پائے جاتے ہیں۔ واضح رہے کہ اس سے قبل، عبرانی میڈیا نے فلسطینیوں کی جانب سے مزاحمتی کارروائیوں میں شدت کے بعد، غاصب صیہونی آباد کاروں میں ذہنی اور نفسیاتی مسائل میں اضافے کی اطلاع دی تھی۔ حکومت کے شعبۂ صحت کے عہدیدار میخائل لیو ایری نے یدیعوت احرونوت کو بتایا تھا کہ حالیہ مہینوں میں ذہنی اور نفسیاتی علاج و معالجے کی خدمات حاصل کرنے کیلئے ایمرجنسی مراکز میں رجوع کرنے والوں میں نمایاں اضافہ ہوا ہے۔