فلسطین آج کے دور کا اخلاقی پیمانہ اور مسلم دنیا کیلئے امتحان ہے، ترک وزیر خارجہ

استنبول : ترکیہ کے وزیرِ خارجہ ہاکان فدان نے کہا ہے کہ فلسطین آج کے دور کا اخلاقی پیمانہ ہے اور یہ مسلم دنیا کے لیے ایک فیصلہ کن امتحان ہے۔
استنبول میں الشرق یوتھ کانفرنس سے خطاب میں ہاکان فیدان نے کہا کہ فلسطین اسرائیلی جارحیت کو روکنے اور اسرائیلی توسیع پسندی کا مقابلہ کرنے کا تقاضا کرتا ہے۔ انہوں نے کہا کہ اسلامی دنیا میں ایک خاموش مگر حقیقی تبدیلی کا عمل جاری ہے۔ تاہم اس کے لیے سب سے بڑھ کر اتحاد کی ضرورت ہے۔ علاقائی مسائل کا پائیدار حل صرف علاقائی قوتیں ہی فراہم کر سکتی ہیں۔ انہوں نے زور دیا کہ اسلامی دنیا کو علاقائی اور معاشی تعاون کے ساتھ ساتھ مشترکہ سلامتی اور دفاعی وژن پر بھی اجتماعی کوششیں کرنا ہوں گی۔ انہوں نے کہا کہ جنگ بندی امن نہیں ہوتی، اصل امن انصاف سے مشروط ہے۔ انصاف کا تقاضا ایک خودمختار، آزاد اور قابلِ عمل فلسطینی ریاست کا قیام ہے۔