فلسطین وقت حاضر کا سب سے بڑا انسانی المیہ ہے، مکہ کانفرنس

مکہ : رابطہ عالم اسلامی کے تحت مکہ کانفرنس میں دنیا بھر سے مختلف مسالک کے علمائے کرام نے شرکت کی۔ اور مسلم دنیا کو درپیش مسائل پر غور کیا۔ حرمین میں دینی امور کے سربراہ شیخ عبدالرحمن السدیس نے کہا کہ کانفرنس کا مقصد مختلف مکاتب فکر کے درمیان تصادم کو ہوا دینے کی کوشش کرنے والوں کا سد باب کرنا ہے تاکہ اسلامی اخوت و اقدارکو نقصان پہنچانے سے روکا جاسکے۔ سیکرٹری جنرل رابطہ عالم اسلامی ڈاکٹر محمد عیسی نے کہا کہ اسلام ہمیں باہمی بھائی چارے کو فروغ دینے کی تلقین کرتا ہے۔ پاکستان کے سابق وفاقی وزیر برائے مذہبی امورنور الحق قادری نے امید ظاہر کی کہ کانفرنس مختلف اسلامی مکاتب فکر کے درمیان پل کا کردار ادا کرے گی۔ ہمیں اپنے مالی وسائل کو استعمال کر کے اہل غزہ تک امداد پہنچانی چاہیے۔ عراق کے ڈاکٹر مشعان محیی علوان الخزرجی کا کہنا تھاکہ غزہ کی پٹی میں فلسطینی بھائی مشکل میں ہیں، جبکہ اس بحران کا دوسرا پہلو فلسطینی عوام کی استقامت، تمام حقوق اور آزادی کے حصول پر اصرار ہے.
مکہ کانفرنس میں مسئلہ فلسطین وقت حاضر کا سب سے بڑا انسانی المیہ قرار دیاگیا۔