فلسطین برائے فروخت نہیں ہے، محمود عباس

رام اللہ : فلسطینی صدر محمود عباس نے کہا ہےکہ فلسطین برائے فروخت نہیں ہے۔ فلسطینی سرزمین کا کوئی حصہ بشمول غزہ۔ غرب الاردن یا یروشلم کو چھوڑا نہیں جائے گا۔ رام اللہ میں فتح کمیٹی کے اجلاس سے خطاب میں محمود عباس نے کہا کہ وہ فلسطینیوں کی بیدخلی کے کسی بھی مطالبے کو تسلیم نہیں کریں گے۔
افریقی یونین کے سربراہی اجلاس میں اپنی شرکت کا حوالہ دیتے ہوئے محمود عباس نے کہا کہ انہوں نے فلسطینی عوام کو بے گھر کرنے کی کسی بھی کوشش کے خلاف فلسطین کے مضبوط موقف کی توثیق کی۔ انہوں نے فلسطینی کاز کے کسی بھی سیاسی حل کیلئے بین الاقوامی قانونی جواز اور عرب امن اقدام کی پاسداری کی اہمیت پر زور دیا۔ انہوں نے کہا کہ فلسطینیوں کی بیدخلی کے تمام منصوبے بین الاقومی قوانین کے خلاف ہیں۔