پاکستان کا اسرائیل کو جنگی جرائم کا مرتکب قرار دینے کا مطالبہ

اسلام آباد : پاکستان نے اقوام متحدہ سے اسرائیل کو جنگی جرائم کا مرتکب قرار دینے کا مطالبہ کیا ہے۔ پاکستان کے نائب وزیراعظم اسحاق ڈار نے عمان میں اقوام متحدہ کے سیکریٹری جنرل انتونیو گوترس سے ملاقات کی۔ پاکستانی نائب وزیراعظم غزہ کی صورتحال پر اردن، مصر اور اقوام متحدہ کی جانب سے مشترکہ طور پر منعقد کی گئی کانفرنس میں شرکت کے لئے اردن پہنچے ہوئے ہیں۔
انہوں نے مشترکہ کانفرنس کی میزبانی پر انتونیو گوترس کا شکریہ ادا کیا اور فوری طور پر جنگ بندی، فلسطینی عوام کے لئے فوری بین الاقوامی حمایت اور انسانی ہمدردی کی بنیاد پر امداد کی ضرورت پر زور دیا۔ اسحاق ڈار نے کہا کہ پاکستان اسرائیل کی جانب سے طاقت کے وحشیانہ استعمال کی شدید مذمت کرتا ہے اور مطالبہ کرتا ہے کہ غزہ میں فوری طور پر غیر مشروط جنگ بندی کی جائے۔ پاکستانی نائب وزیراعظم نے سیکریٹری جنرل سے مسئلہ جموں کشمیر کے منصفانہ حل کے لیے بھی کردار ادا کرنے کی درخواست کی۔