مینڈیٹ چوروں کی ہر سازش کا منہ توڑ جواب دینگے، پاکستان تحریک انصاف

پاکستان تحریکِ انصاف کے ترجمان کی جانب سے عطاء تارڑ کی پریس کانفرنس پر ردِ عمل دیتے ہوئے اسے مخصوص نشستوں پر سپریم کورٹ کے تاریخی فیصلے کے نتیجے میں ملنے والی شرمندگی مٹانے کی مکروہ کوشش قرار دیا ہے۔ پی ٹی آئی کی جانب سے جاری بیان میں کہا گیا ہے کہ مینڈیٹ چوروں اور ان کے سرپرستوں کی ہر سازش کا عوامی تائید و حمایت سے منہ توڑ جواب دیا جائے گا۔ ذلت اور شکست سے بری طرح گبھرایا ہوا اور دہشت زدہ مجرم حکومتی ٹولہ اپنی دھمکیوں سے 24 کروڑ عوام کو ڈرانا چاہتا ہے۔
پی ٹی آئی ترجمان کا بیان میں مزید کہنا تھا کہ پاکستان کسی ان ڈکلیئرڈ مارشل لا کے نتیجے میں بننے والی جاگیر نہیں، 24 کروڑ پاکستانیوں کا مسکن اور آئین کے تابع ایک ریاست ہے۔ اپنی خواہش کو قانون کا درجہ دے کر ملک تباہی و انتشار کی دلدل میں دھکیلنے والوں کا ہر میدان ہر محاذ پر ڈٹ کر مقابلہ کیا ہے اور کریں گے۔ ترجمان کا مزید کہنا تھا کہ اقوامِ متحدہ سے لے کر امریکی کانگرس تک اور ہیومن رائٹس کونسل سے ایمنسٹی انٹرنیشنل تک ہر آزاد اور غیر جانبدار ملکی و غیر ملکی ادارے نے مینڈیٹ چور مجرموں کے ہاتھوں بنیادی انسانی حقوق کی خلاف ورزیوں کے خلاف آواز اٹھائی ہے۔
خیال رہے کہ مسلم لیگ ن سے تعلق رکھنے والے وفاقی وزیر اطلاعات و نشریات عطا تارڑ نے پی ٹی آئی کی مخصوص نشستوں کے حوالے سے سپریم کورٹ کے فیصلے کے خلاف اپیل کرنے، تحریک انصاف پر پابندی عائد کرنے اور عمران خان، عارف علوی اور قاسم سوری کے خلاف آرٹیکل چھ کی کارروائی کے لیے سپریم کورٹ سے رجوع کرنے کے فیصلے کا اعلان کیا تھا۔ حکومت کے اس غیر متوقع اعلان پر سیاسی جماعتوں کی جانب سے سخت ردعمل سامنے آ رہا ہے۔ پیپلز پارٹی، اے این پی، جے یو آئی نے پابندی کی سختی سے مخالفت کی ہے۔