رفح پر رات بھر آتش وآہن کی بارش، 100 سے زائد فلسطینی شہید

غزہ: صیہونی فوج نے غزہ کے علاقے رفح میں قیامت برپا کردی۔ رات بھر جنگی طیاروں نے رفح کے مضافاتی علاقوں میں کئی رہائشی عمارتوں اور دو مسجد پر بمباری کی ۔ حملے میں سو سے زائد افراد شہید اور ڈھائی سو سے زائد زخمی ہوگئے۔ درجنوں افراد ملبے تلے دبے ہیں جس سے شہادتوں میں اضافے کا خدشہ ہے۔ شہدا میں زیادہ تر خواتین اور بچے شامل ہیں اسرائیل نے کہا ہے کہ اس نے جنوبی غزہ میں شبورہ کے علاقے میں حماس کے ٹھکانوں کو نشانہ بنایا ہے۔ حماس نے خان یونس میں جوابی کارروائی کے دوران گیارہ صیہونی فوجیوں کو ہلاک کردیا۔ فلسطینی وزارت صحت کا کہنا ہے کہ غزہ میں سات اکتوبر سے جاری اسرائیلی بربریت میں اب تک شہید فلسطینیوں کی تعداد 28 ہزار تین سو ہوگئی ہے جبکہ 67 ہزار 784 فلسطینی زخمی ہیں۔