مغربی کنارے میں مںظم حملے حکومتی سرپرستی میں ہورہے ہیں، او آئی سی

جدہ: اسلامی تعاون تنظیم او آئی سی نے مقبوضہ مغربی کنارے سمیت مشرقی یروشلم میں انتہاپسند صیہونی آبادکاروں کی بڑھتی ہوئی دہشت گردی اور حملوں کی شدید مذمت کی ہے۔ اپنے بیان میں او آئی سی نے کہا کہ فلسطینی شہریوں، ان کی املاک، زمینوں اور مقدس مقامات پر یہ منظم حملے اسرائیلی قابض فوج کی سرپرستی اور حوصلہ افزائی کے ساتھ جاری ہیں۔ جو بین الاقوامی قوانین اور اقوام متحدہ کی قراردادوں کی کھلی خلاف ورزی ہے۔ او آئی سی کے مطابق آبادکار ملیشیاؤں کی یہ بڑھتی ہوئی تشدد پسندی الحاق، جبری بے دخلی، نسلی تطہیر اور نسل کشی کی اُن پالیسیوں کا تسلسل ہے جو اسرائیلی قبضہ پوری مقبوضہ فلسطینی سرزمین پر مسلط کر رہا ہے۔ او آئی سی نے عالمی برادری، خصوصاً سلامتی کونسل، سے مطالبہ کیا کہ وہ اپنی ذمہ داریاں پوری کرتے ہوئے ان حملوں کو روکے، فلسطینی عوام کو بین الاقوامی تحفظ فراہم کرے اور مجرموں کو عالمی قانون کے تحت جوابدہ بنائے۔