شمالی وزیرستان اور کوئٹہ میں کارروائیاں، 12 دہشت گرد ہلاک، ٹھکانے تباہ

اسلام آباد : سیکیورٹی فورسز کا شمالی وزیرستان میں انٹیلی جنس آپریشن، 6 دہشتگرد ہلاک کر دیئے، آپریشن کے دوران فوجیوں اور دہشت گردوں کے درمیان شدید فائرنگ کا تبادلہ ہوا۔ آئی ایس پی آر کے مطابق فائرنگ کے تبادلے میں 6 دہشتگرد مارے گئے ، آپریشن کے دوران دہشتگردوں کے ٹھکانے کو بھی تباہ کر دیا گیا، مارے گئے دہشت گرد متعدد کارروائیوں سمیت شہریوں کی ٹارگٹ کلنگ میں ملوث تھے، سیکیورٹی فورسز کی جانب سے علاقے میں سینیٹائزیشن آپریشن کیا جاری ہے، ترجمان کا کہنا ہے کہ سیکیورٹی فورسز ملک سے دہشت گردی کی لعنت کو ختم کرنے کے لیے پرعزم ہیں۔ ادھر بلوچستان کے دارالحکومت کوئٹہ میں پولیس کی گاڑی پر حملے کرنے والے 4 دہشت گرد جوابی کارروائی میں مارے گئے۔سریاب روڈ پر دہشت گردوں نے پولیس موبائل پر فائرنگ کی جس میں خوش قسمتی سے کوئی جانی نقصان نہیں ہوا۔ دوسری جانب راولپنڈی میں کالعدم ٹی ٹی پی کے 2 دہشت گرد اپنے ہی ساتھیوں کی فائرنگ سے ہلاک ہوگئے۔ دہشت گردوں سے دھماکا خیز مواد، دستی بم برآمد ہوئے ہیں۔