Raza Musani 
تہران: انقلاب ایران کی چھیالیسویں سالگرہ پر پورے ملک میں لاکھوں افراد سڑکوں اور شاہراہوں پر نکل آئے اور قومی جوش و خروش اور مذہبی جذبہ و ولولہ کے ساتھ بھرپور جشن منایا۔ ایران کی فضا امریکہ مردہ باد اور اسرائیل مردہ باد کے نعروں سے گونج اٹھی۔ انقلاب اسلامی کی سالگرہ کے سلسلے میں مرکزی ریلی تہران میں نکالی گئی۔ دارالحکومت کے مختلف حصوں سے لوگ مختلف شاہراہوں سے ہوتے ہوئے آزادی اسکوائر پر جمع ہوئے۔
ریلی سے خطاب میں ایرانی صدر مسعود پیزشکیان نے کہا ہے کہ ایران نے استبدادی نظام کو اکھاڑ پھینکا وہ دشمنوں کی تمام سازشوں کو ناکام بنادے گا۔ انہوں نے مزید کہا کہ ہماری کامیابی عوامی اتحاد و اتفاق میں مضمر ہے اور اسلامی انقلاب اسی اتحاد کی طاقت سے وجود میں آیا۔ امریکی صدر ڈونلڈ ٹرمپ کے حالیہ دعوے پر تنقید کرتے ہوئے کہا کہ وہ ایران کے ساتھ بات چیت کرنا چاہتے ہیں اور ساتھ ہی ایک صدارتی یادداشت بھی جاری کرتے ہیں جس کا مقصد ایران کی تیل کی برآمدات کو صفر تک پہنچانا ہے۔
مسعود پزشکیان نے کہاکہ ٹرمپ کا دعویٰ ہے کہ ایران علاقائی سلامتی کو درہم برہم کر رہا ہے لیکن یہ اسرائیل ہے جو امریکہ کی حمایت سے عدم تحفظ کی جڑ ہے اور غزہ، لبنان، فلسطین، شام، ایران اور جہاں چاہتا ہے کے مظلوم عوام پر بمباری کرتا ہے۔
