Raza Musani 
جدہ: اسلامی تعاون تنظیم نے صیہونی وزیر اعظم بنیامین نیتن یاہو اور وزیر دفاع یسرائیل کاٹز کے مغربی کنارے کے طولکرم کیمپ میں گھسنے کی شدید مذمت کی ہے۔ او آئی سی نے ایک بیان میں اسرائیلی اقدام کو فلسطینی عوام کے خلاف جاری جارحیت کی توسیع قرار دیا ہے۔ او آئی سی نے مغربی کنارے کے کیمپوں کو نشانہ بنانے کی جارحیت کے خطرے سے خبردار کرتے ہوئے کہا کہ یہ اقدام بین الاقوامی قانون اور متعلقہ اقوام متحدہ کی قراردادوں کی صریح خلاف ورزی ہے۔ بیان میں کہا گیاہے کہ فلسطینیوں کے گھروں کی مسماری اور ان کی جبری نقل مکانی پناہ گزینوں کے مسئلے، ان کے وجود اور ان کی واپسی کے حق کو ختم کرنے کی کوششوں کے سلسلے کی کڑی ہے۔ او آئی سی نے بین الاقوامی برادری سے اپنی ذمہ داریاں سنبھالنے، اسرائیل کی جاری خلاف ورزیوں اور جرائم کو روکنے کے لیے فوری مداخلت کرنے اور ذمہ داروں کو جوابدہ ٹھہرانے کا مطالبہ کیا۔
