Raza Musani 
جدہ: اسلامی تعاون تنظیم نے صیہونی وزیر اتمار بن گویر کے آبادکاروں کے ساتھ مسجد اقصیٰ پر دھاوے کی مذمت کرتے ہوئے اسے دنیا بھر کے مسلمانوں کے جذبات پر کھلا حملہ قرار دیا ہے۔ اسلامی تعاون تنظیم نے اپنے بیان میں کہا کہ اسرائیلی فوج کے تحفظ میں اتمار بن گویر اور آبادکاروں کا مسجد اقصیٰ کے احاطے میں داخل ہونا خطرناک اشتعال انگیزی ہے۔ تنظیم نے مسجد کے اندر اسرائیلی پرچم لہرانے اور اشتعال انگیز مذہبی رسومات کی ادائیگی کو بین الاقوامی قوانین کی کھلی خلاف ورزی قرار دیا۔ تنظیم نے مسجد اقصیٰ میں جاری خلاف ورزیوں کے نتائج کا مکمل ذمہ دار اسرائیل کو ٹھہراتے ہوئے عالمی برادری سے فوری مداخلت کا مطالبہ کیا۔ بیان میں کہا گیا کہ اسرائیل کی جانب سے القدس کی حیثیت تبدیل کرنے کی کوششیں خطے میں مزید کشیدگی اور عدم استحکام کو ہوا دے سکتی ہیں۔
