جوہری معاہدے سے کم پر کوئی بات نہیں ہوگی، ایران

ویانا : جوہری معاہدے سے کم پر کوئی بات نہیں ہوگی، جوہری معاہدہ ہماری ریڈ لائن ہے۔یہ بات ایران کے نائب وزیر خارجہ اور سینیئر مذاکرات کار علی باقری نے نے کہی۔ انہوں نے کہا کہ ایران کے مذاکراتی وفد نے جدت عمل کا مظاہرہ کرتے ہوئے مقابل فریق کے سامنے ظالمانہ پابندیوں کی منسوخی اور ایٹمی مسائل کے موضوع کے تحت اپنی تجاویز پیش کی ہیں۔ ویانا مذاکرات میں انجام پانے والے 6 دور کے مذاکرات کے اختلافی موضوعات ابھی حل نہیں ہوئے ہیں اور زیرغور ہیں۔ انہوں نے کہا کہ ویانا کے6 دور کے مذاکرات اور پھر چھٹے دور کے مذاکرات کے نتائج کی بنیاد پرپیش کی جانے والی تجاویز کے متن پر چند اختلافی موضوعات کے بارے میں فریقین کے درمیان اب بھی اختلافات موجود ہیں جن کے بارے میں اعلیٰ سطح پر فیصلہ لینے کی ضرورت ہے۔ فریق مقابل نے ان میں سے بعض مسائل کو گذشتہ چند روز کے دوران ہونے والی گفتگو کے دوران تسلیم کرلیا ہے جبکہ بعض مسائل کو قبول نہیں کیا ہے۔