سنی اتحاد کونسل کو مخصوص نشستیں نہ دینا زیادتی ہے، علامہ راجہ ناصر عباس

اسلام آباد : سربراہ ایم ڈبلیو ایم علامہ راجہ ناصر عباس کا کہنا ہے کہ پی ٹی آئی کو قانونی حق حاصل ہے، وہ جیتی ہوئی ہے، اسے مخصوص نشستیں نہ دینا زیادتی ہے۔ اسلام آباد ہائی کورٹ میں میڈیا سے گفتگو میں علامہ راجہ ناصر عباس نے کہا کہ آئین میں عوام کو حق دیا گیا ہے کہ وہ اپنے نمائندوں کا انتخاب کریں۔ ان کا کہنا ہے کہ 8 فروری کو عوام نے ووٹ ڈالا جسے نو فروری کو تبدیل کیا گیا، الیکشن کمیشن فری اینڈ فیئر الیکشن کروانے میں ناکام رہا۔ علامہ راجہ ناصر عباس نے کہا ہے کہ 14 دنوں کے اندر فارم 45 پبلش کرنے کی ذمے داری تھی لیکن فارم 45 پبلش نہیں کیے گئے۔ ان کا مزید کہنا تھا کہ ہائی کورٹ میں اس لیے آئے ہیں کہ عدالت آرڈر کرے کہ فارم 45 پبلش کیے جائیں۔ پاکستان میں ہونیوالا الیکشن پوری دنیا میں سوالیہ نشان بنا ہوا ہے۔