پریس کانفرنس نہیں کرنی، پرویز الہی کا پی ٹی آئی نہ چھوڑنے کا اعلان

لاہور: سابق وزیراعلیٰ پنجاب چوہدری پرویز الٰہی نے کمرہ عدالت میں صحافیوں سے غیر رسمی گفتگو کی، جس میں انہوں نے کہا کہ پریس کانفرنس ابھی نہیں کرنی۔ پاکستان تحریک انصاف کے صدر چوہدری پرویز الٰہی نے مزید کہا کہ آج کی مہنگائی کے ذمے دار نواز شریف اور شہباز شریف ہیں۔ دونوں بھائیوں نے آئی ایم ایف سے غلط شرائط پر قرضے لیے۔ چیئرمین پی ٹی آئی نے آئی ایم ایف سے ایسا کوئی معاہدہ نہیں کیا تھا۔ انہوں نے کہا کہ ملک میں مزید بے روز گاری ہونے جارہی ہے۔ اس ملک کو بہتر کرنا ہوگا، لوگ خودکشی پر اتر آئے ہیں۔ سابق وزیراعلیٰ پنجاب کا کہنا تھا کہ نگراں حکومت کے پیچھے نواز شریف اور شہباز شریف فارمولا ہے۔ افغانستان جیسا ملک ہم سے آگے جارہا ہے۔ چیئرمین پی ٹی آئی کے دور حکومت میں پیٹرول کی یہ قیمت نہیں تھی۔