Raza Musani 
نیویارک: نیویارک پولیس نے کولمبیا یونیورسٹی کے فلسطینی حامی طالب علم محمود خلیل کی گرفتاری کیخلاف ٹرمپ ٹاور میں دیا گیا دھرنا ختم کرادیا۔ امریکی-یہودی گروپ جیوش وائس فار پیس کے درجنوں ارکان گذشتہ روز ٹرمپ ٹاور میں داخل ہوئے اور لابی میں دھرنا دے دیا۔ مظاہرین نے مختلف پلے کارڈ اٹھا رکھے تھے، جن میں لکھا تھا کہ نازیوں سے لڑیں طلبہ سے نہیں اور محمود خلیل کو رہا کرو۔ مظاہرین نے کہا کہ وہ فلسطینیوں پر ظلم کرنیوالی فاشسٹ حکومت کی کوششوں کے ساتھ نہیں ہیں۔ امریکی فنڈ سے فلسطینیوں کی نسل کشی کے اقدامات بند کئے جائیں۔ دو گھنٹے بعد پولیس ٹرمپ ٹاور میں داخل ہوئی اور کار سرکار میں مداخلت کے الزام میں اٹھانوے افراد کو گرفتار کرلیا۔ پولیس نے مظاہرین کو بازوؤں اور ٹانگوں سے گھسیٹ کر ٹاور سے باہر نکالا۔
