Raza Musani 
اسلام آباد: سینیٹر رضا ربانی نے کہا ہے کہ عالمی مالیاتی اداروں کی شکل میں پاکستان پر نئے آقا آگئے ہیں۔ مالیاتی سامراجوں نے آئی ایم ایف سے معاہدے میں پہلے اپنی شرائط منوائیں، معاہدے میں ان کی شرائط نے پاکستان کی خود مختاری پر سمجھوتا کیا۔ رضا ربانی نے کہا کہ اب مالیاتی ادارے پاکستان کو اپنے راج کا حصہ سمجھتے ہیں، پاکستان کو آئینی اور سیاسی معاملات پر ڈکٹیشن دے رہے ہیں۔ سینیٹر رضا ربانی نے کہا کہ چند روز قبل آئی ایم ایف تجویز دے رہا تھا کہ کن کلاسوں کو ٹیکس نیٹ میں شامل کیا جائے اور کن کو شامل نہ کیا جائے. اب ورلڈ بینک نے تجویز کیا ہے کہ وزراء کی نیشنل کونسل ہونی چاہیے، یہ ایک آزاد ریاست کی حکمرانی میں کھلی مداخلت ہے۔ انہوں نے کہا کہ جس انداز میں سفارت کار تزویراتی علاقوں کا دورہ کر رہے ہیں اور ملک کے اندرونی معاملات پر تبصرہ کر رہے ہیں۔ اس سے یہ یقین ہوتا ہے کہ ایسٹ انڈیا کمپنی کی ایک نئی شکل نے پاکستان پر حملہ کر دیا ہے۔
