غزہ کا نیا معاہدہ 60 روزہ جنگ بندی پر مشتمل ہوگا، مصر

قاہرہ : مصری وزیر خارجہ بدر عبد العاطی نے انکشاف کیا ہے کہ غزہ میں جنگ بندی معاہدے پر کام جاری ہے۔ جو ابتدائی طور پر ساٹھ روزہ جنگ بندی پر مشتمل ہو گا۔ مصری وزیر خارجہ بدر عبد العاطی نے کہا کہ ان کا ملک نئے معاہدے پر کام کر رہا ہے جس میں کچھ اسرائیلی یرغمالیوں کی رہائی کے بدلے 60 دن کی جنگ بندی اور محصور علاقے میں انسانی امداد کی تیزی سے رسائی شامل ہے۔ انہوں نے کہاکہ جنگ بندی کی نئی تجویز مصر، قطر اور امریکہ کی مشترکہ کوشش ہے۔ انہوں نےکہا کہ امریکا کو اس بات کی اہمیت کاادراک ہے کہ غزہ سے متعلق کسی بھی آئندہ معاہدے میں جنگ بندی کے پائیدار ہونے کی ضمانتیں شامل ہونا ضروری ہیں۔ انہوں نے کہا کہ ساٹھ روزہ جنگ بندی کے بعد اگلے مرحلے میں پیش رفت کی امید ہے۔ انھوں نے بتایا کہ فائر بندی کے بعد چند ہفتوں کے اندر غزہ کی تعمیر نو کے لیے ایک کانفرنس منعقد کی جائے گی۔