Raza Musani 
واشنگٹن : امریکی محکمہ خارجہ کی سابق نائب وزیر وینڈی شرمین نے تسلیم کیا ہے کہ اسرائیلی وزیراعظم بنیامین نیتن یاہو نے غزہ میں نسل کشی کی صورتحال کو جنم دینے میں کردار ادا کیا۔ بلوم برگ سے گفتگو میں وینڈی شرمین نے کہا کہ نیتن یاہو کی پالیسیوں نے امریکا اور دیگر فریقین کو ایک ایسے راستے پر ڈالا جس کے نتیجے میں غزہ میں تباہی اور خطے میں عدم استحکام پیدا ہوا۔ انہوں نے کہا کہ وہ قانونی طور پر یہ فیصلہ نہیں کر سکتیں کہ آیا یہ نسل کشی ہے یا نہیں، لیکن اس میں کوئی شک نہیں کہ غزہ مکمل طور پر تباہ ہو چکا ہے۔ وینڈی شرمین نے کہا کہ انہیں اسرائیل کے حقِ ریاست کی حمایت ہے، لیکن کسی بھی قوم کی تباہی قابل قبول نہیں۔ فلسطینی عوام کو گھر، وقار اور امن کا حق حاصل ہے اور اسرائیل کو بھی سلامتی اور امن کا حق حاصل ہے۔
