دھمکیوں کے ماحول میں مذاکرات نہیں ہوتے، ایرانی صدر کا ٹرمپ کو جواب

تہران : ایرانی صدر مسعود پزشکیان نے کا کہنا ہے کہ تہران مساوی حیثیت سے مذاکرات چاہتا ہے۔ دھمکیوں کے ماحول میں مذاکرات نہیں ہوتے۔ ایران کے صدر مسعود پزشکیان نے ملک کے اعلیٰ عہدیداروں سے ملاقات کے دوران کہا کہ امریکہ کا رویہ مذاکرات کی درخواست سے یکسر متصادم ہے۔ایسا نہیں ہوسکتا کہ ایک طرف دھمکیاں دیں اور دوسری طرف مذاکرات کی درخواست بھی کریں۔ مسعود پزشکیان نے کہاکہ اگر آپ مذاکرات کرنا چاہتے ہیں تو پھر دھمکی کس لیے؟ آج امریکہ کو اپنے اسی متضاد روئے کی وجہ سے دنیا بھر میں رسوائی کا سامنا ہے۔ انہوں نے ملک میں اتفاق اور اتحاد کو فروغ دینے کی اہمیت پر زور دیا اور کہا کہ اندرونی تنازعات کے حل سے غیر ملکی سازشوں کو ناکام بنایا جائے گا۔