میانمار اور تھائی لینڈ زلزلے سے لرز اٹھے، ڈیڑھ سو سے زائد افراد ہلاک

ینگون: میانمار میں سات اعشاریہ سات شدت کے زلزلے نے تباہی مچادی۔ لرزتی زمین نے فلک بوس عمارتیں منٹوں میں ملبے کا ڈھیر بنادیں۔ ایک سو پچاس افراد ہلاک اور سینکڑوں زخمی ہوگئے۔ لوگوں کی بڑی تعداد ملبے تلے دب گئی۔ ہلاکتوں میں اضافے کاخدشہ ہے۔ امریکی جیولوجیکل سروے کے مطابق زلزلے کی شدت 7.7 ریکارڈ کی گئی۔ زلزلے کی گہرائی 10 کلومیٹر تھی۔ زلزلے کا مرکز میانمار کے شہر منڈالے سے 17.2 کلومیٹر کے فاصلے پر تھا۔ زلزلے کے بعد شدید آفٹر شاکس بھی محسوس کیے گئے۔ سرکاری میڈیا کے مطابق زلزلے سے 5 شہروں اور قصبوں میں متعدد عمارتیں ملبے کا ڈھیر بن چکی ہیں۔ یانگون۔ منڈالے ایکسپریس وے پر 2 پل بھی منہدم ہوگئے۔ میانمار کی فوجی حکومت نے متاثرہ علاقوں میں ہنگامی حالت نافذ کر دی۔
زلزلے سے تھائی لینڈ میں بھی تباہی ہوئی اور آٹھ افراد جان سے گئے۔ زلزلے کے جھٹکے چین میں بھی محسوس کئے گئے۔