عزاداری آئینی و قانونی حق ہے، محدودیت سے گریز کیا جائے، شیعہ علماء کونسل

اسلام آباد: شیعہ علماء کونسل پاکستان کے مرکزی سیکرٹری جنرل علامہ شبیر حسن میثمی نے واضح کیا ہے کہ عزاداری آئینی و قانونی حق ہے، محدودیت سے گریز کیا جائے۔ چار دیواری کے اندر مجالس و محافل کے انعقاد پر بانیان کیخلاف مقدمات کا اندراج غیر آئینی اقدام ہے، یہ سلسلہ روکا جائے۔ توازن کی غیر منصفانہ و ظالمانہ پالیسی کے تحت علماء و ذاکرین عظام، خطباء حضرات اور معتدل مزاج شخصیات پر مختلف اضلاع میں داخلے پر پابندی اور زبان بندی سے اجتناب لازم ہے، انتظامیہ کی جانب سے مجالس و جلوس عزا پر بلاجواز پابندی حتیٰ کہ چار دیواری کے اندر مجالس پر پابندی، جلوسوں میں رکاوٹ، محدودیت، بانڈ فلنگ اور این او سی جیسی شرائط عائد کرنے اور مختلف حیلے بہانے بنا کر مجالس و جلوسوں میں رکاوٹ ڈالنے سے باز رکھا جائے، امن و امان کے قیام کو یقینی بنانے کیلئے مثبت، سنجیدہ فکر اور معتدل مزاج افراد کی خدمات حاصل کی جائیں۔ انہوں ںے کہا کہ عشروں سے روایت رہی ہے کہ ”یکم محرم تا 10 محرم“ وسیع پیمانے پر الیکٹرانک میڈیا پر پروگرامز نشر اور پرنٹ میڈیا پر آرٹیکلز شائع ہوتے تھے، لیکن کچھ عرصہ سے محرم الحرام کے حوالے سے انتہائی محدودیت دیکھی جا رہی ہے، لہذا سابقہ مثبت روایت کو برقرار رکھنے کی تلقین کی جائے، علاوہ ازیں ملک بھر میں بجلی کی ترسیل کو یقینی بنایا جائے تاکہ ملک دشمن، دہشتگرد اور شرپسند عناصر ناجائز فائدہ نہ اٹھا سکیں.